人哋成日讲，心情唔好，运气都会跟住一齐唔好。但係我真係唔知呢两样嘢係边个跟边个。

今日朝早终于搞掂咗integrated嘅final，本身应该心情非常畅快至係架嘛，但係就係点都开心唔到。虽然今次点讲都算係历来最认真嘅一次，四个人讲一个钟，而且占总分嘅30%，点都要做多好多嘢，但係今次又係一日到黑喺度等听日等听日，应该做嘅嘢一直都未做好，次次小组交功课都係自己迟交，仲要自己係组长添，冇面啊。不过今次终于算係背过稿（其实係寻晚漏夜洗咗两三个钟背嘅），算係认真过啦。认真仲有一个表现，我着咗件西上去讲嘢啊，不过西套T，其实都唔算得係正装，唉啊，求其啦，抢眼嗟。始终准备时间太少，份稿点都係唔熟，听完上一场嘅presentation之后就更加混乱啦，最后上去讲嘅时候都係会有时疾下，不过比以前嗰啲根本就冇背过靠印象上台爆肚嘅好唔少啦，但係自己始终都係唔满意。又开始有个问题啦，其实爆肚都冇乜唔好嘅，但係无伦係背稿定係爆肚，都係唔知唔觉就会讲得好快好快，然后就难逃一疾，而且爆肚high起上嚟会更加快，但係慢慢讲我又真係唔係好钟意，讲讲下个脑跟住慢埋一份，到最后又係会疾，而且真係会讲到我都闷，噉究竟係背定係唔背呢？不过终于都算搞掂咗一个大头，有少少released，尽管自己真係对今次嘅表现颇失望下。我可以做得好好多嘅！

后面投影嗰个desktop咁核突，                        越嚟越觉得自己要严重增磅啦

一睇就知唔係我部laptop啦                              

亦都有好多人话，个人攰，心情自然就会唔好，也许啦。

我今日除咗有少少released之外就真係冇乜好嘅心情啦，仲有下昼嘅current affairs，最憎嘅一堂课，应该係最憎嘅一个tutor。我今日真係差啲想罢佢课架啦。本嚟做final就迟到成点先放学架啦，然后点半又要上课啦，中间剩低半个钟食饭，仲要为咗写佢嗰篇嘢要留喺课室奋斗，仲要揾人帮手买麦伯，条气就已经好唔顺架啦，仲要我啱开始单挑只big mac嘅时候佢就入嚟啦，我见佢入嚟准备上课我都已经识做收埋晒啲嘢食架啦，嗰只死变态仲要咬住你唔放，又喺度放冷箭闹人，又话你上课食嘢呢样唔好嗰样唔好，我明明都已经收埋咗啦，而且佢都仲未开始上课！激气啊，跟住上课啦，佢嗰把口真係冇句好嘢出架，一开始上课就塞两个assignment畀我哋，下星期要写一篇argument，20%，75分钟内搞掂，下下下星期final，30%，仲要做一份written report，麻Q烦！整到我哋一班人个个都冇嘢好讲，跟住就好无聊噉嗌我哋卖苹果广告，同以前一样，先前唔讲清楚自己要乜嘢，到我哋上去讲嘅时候就呢样嗰样都睇唔顺眼，又要独裁到死，有创意少少又话对佢唔make sense，一定要跟住佢畀嘅意见改足几廿次先啱，一唔係就做到有咁捞得咁捞，有咁弱智得咁弱智，噉佢就满意啦，便有噉嘅老师架，一啲都唔尊重学生嘅idea嘅，心谂卖得畀你嘅嘢一定冇市场啦，我哋有乜idea关你叉事咩。仲要整到我差啲同人闹交，不过我亦都进一步噉体会到cultural shock呢件物体。最后大半班人畀佢留到五点半过先放学，仲要企尾班车返，真係乞人憎啊！

跟住就突然觉得有好多嘢并唔似你想象中咁好，好似身边一啲比较close嘅“关系”，有啲嘢又唔会好似你想象中咁衰，好似班tree。

我亦都听过人讲，心情唔好，天气都会跟住一齐唔好。

挨晚一个人去海边跑步，跑咗上岛以嚟最长嘅一次。但係周围嘅环境真係跟住心情一齐差，反常地一啲风都冇。无聊喺部手提上面打咗一堆冇乜意思嘅字：29号.今日个海空咗.今日个海涨潮早咗.今日个海浪大咗.今日冇乜风,可能时间未到.今日一个人跑步.今日心情唔好.

返嚟之后喺夜晚打咗个电话畀公公婆婆。真係好耐未打过电话返去畀佢哋啦，听到佢哋把声真係好开心啊，特别係真係已经好耐未见过佢哋亦都未同佢哋讲过嘢啦。听到佢哋亲口同我讲话佢哋宜家好好，真係乜事都冇嘅时候，个人真係突然间放松咗好多，心情真係好番晒。真係好挂住佢哋啊，之前放假嗰阵时朝朝早同佢哋一齐去饮茶嘅嗰段日子唔知几时先可以返番嚟啦。唔知佢哋宜家点样呢，听讲公公瘦咗，不过佢个肚腩都係时候减减啦，婆婆手术完咗，恢复期亦都已经过埋啦，可以正常食番嘢啦，两个都好好地噉就最好啦。好耐未听过婆婆闹人啦，仲有公公嘅乡音啊。

跟住就做咗，应该係继续完成咗一件对于某些人嚟讲比较怪异嘅事，我终于有时间睇完嗰晚down嘅P.S. I Love You啦。先唔讲佢有几天马行空，或者某啲地方畀人感觉颇怪，睇完之后真係会令到你个人心情继续变好架，而且有好几个scene係真係睇到你好有feel嘅，而且背景音乐真係做得好好，揾到好多首好好听嘅歌，特别係主题嗰首背景，叫做Kisses and Cake，仲有片尾James Blunt嗰首Same Mistake，仲有唔少民谣feel嘅歌都唔错，音乐真係帮咗呢出戏唔少。比较庆幸自己仲未麻木或者心情差到连呢种爱情喜剧都帮唔到自己。

心情好番就记得keep落去啦。