好耐未打过blog啦，应该有一个月。

喺过去嘅呢一个月里面，要做嘅要烦嘅越嚟越多，但係就唔觉自己嘅心情同呢堆嘢成过正比，但係点都好，起码叫做习惯咗呢种冇心情嘅心情，都算係一种进步。有时会觉得个人好攰，唔通我都会有周期？有好多原先觉得好开心嘅嘢都已经冇乜动力去做啦，好似打电话，已经好耐冇打过畀好多人啦，好似我呢个blog，噉就一个月过咗去啦。前排收到一封颇unexpected嘅email，而且仲係有series嘅，但係我就真係唔知道我仲可以回复到乜嘢畀对方，宜家嘅情况係我已经连一句敷衍嘅说话都懒得去打啦。

谂起近排我一路都讲紧话题，我老咗。啱开始嘅时候只係有一次觉得自己黑眼圈深咗而发出嘅一声感叹，点知到宜家呢句话已经离唔到口啦，呢三个字係咪已经慢慢慢慢成为咗我嘅心声呢？虽然嗰啲荒诞嘅谂法仲喺度，但係就发现自己已经冇以前咁可爱啦。虽然仲係好怕孤独，但係个人就明显比以前冷咗唔少，而且主观上，起码主观上觉得自己比以前独立咗。噉係咪一种衰老嘅迹象呢？我仲未想变老，更加唔想咁快就被逼地去做一个大人，at least，成年人，至少我仲未准备好，亦都未体验完我嘅未成年。喺呢个环境里面真係过得好唔舒服，係咪就係因为呢个原因呢？睇嚟心请真係好影响人嘅年龄。

再发泄两件事。

宿舍里面真係嘈到我烦晒啦，迫于无奈，上个weekend终于忍唔住去Watson’s买咗对耳塞，呢两晚试过下效果，可以话係有一定效果，但係就始终滤唔走嗰把讨厌嘅声，好讨厌嗰个人，已经唔係文化差异嘅问题啦。I’m annoyed.

最近畀人话我专做电灯胆，点解只可以係一个人做两个人嘅电灯胆，但係就唔可以两个人做一个人嘅电灯胆？而且一个好明显嘅事实就係我一个还我一个，佢哋两个还佢哋两个，我哋之间同以前冇乜差别，根本就冇呢个电唔电灯胆嘅问题。Still, I’m disturbed.点解仲会有呢啲噉嘅无聊嘅人喺度夹硬将我拖落呢趟浑水呢？我已经够烦啦，你哋要无聊嘅话自己揾番段合约           啦，反正宜家已经成风啦。更加讽刺嘅係两个人嘅其中一个仲话点解呢排我好似刻意地避开紧佢哋。好地地噉朋友还朋友爱情还爱情咪几好啰，点解唔少人就係都要讲佢哋对立起身呢？