今日係VJ嘅Arts Day，又係一早返去无聊啦，不过今日我哋可以着自己钟意嘅衫返去，只要係PE tee加short pants就ok啦，加上今日唔使上课，所以感觉都算比之前嗰两日自在啲啦，尽管自己着得更加异类。

朝早VJ安排咗一个compulsory嘅瑜伽课捭我哋所有人，有少少难以理解啰，不过上课玩落其实都ok好玩嘅。其他时间就基本上係周围乱哨或者係喺图书馆过啦，发现图书馆係中国学生嘅聚集地。

剩低就冇乜好玩啦，唔好讲佢啦。

今日返嚟捭两条友呃咗去vivo，其实都唔算呃嘅，我本身都想去食饭。本身讲好话去咗揾地方食饭先架嘛，跟住又一个唔该走咗去机室仲要将你隐埋形，嬲起上嚟咪自己一个去食饭啰，佢哋真係好过分啊，仲要嗌返你返嚟借走你张学生证，到宜家都仲未还，激气啊！最后仲要一个人喺咁大间空荡荡嘅food court度食闷饭，我最憎就係一个人食架啦，喺省实嗰阵时我係宁愿买两个杯面返宿舍独家村都唔要一个人喺饭堂食嘅，我上岛之后第一次食闷饭啊！！！

心情低落咗一日。其实我係咪有时应该要独立啲呢？或者真係要学下做独家村。

今日JC第一日，癫啦，神早五点半就要起身赶6点嘅车去VJC，救命啊，我寻晚3点啊。。。

JC仲有两个星期要玩。。。

六点半就到东海岸嗰边嘅VJ啦，天有排都仲未光，不过更加灵异嘅係竟然有学生仲早过我哋到，佩服佩服。冇嘢好做又暂时唔想训就周围行下影下相啦，跟住就终于都忍唔住上去上次嚟就已经好想上去嘅嗰间树屋度玩下啦，都OK好玩嘅。然后发现连接三间树屋之间嘅吊桥弹力真係好强啊，仲同黄骅拍咗一段好弱智嘅video，希望已经捭佢洗咗啦。。。

等等下个天开始慢慢慢慢光啦，非常艰难咁等到啲buddy开始一个一个慢慢过嚟见面啦，见到越嚟越多人都揾到佢嘅buddy啦，但係我嗰个就一直都仲未现身，嗰啲uncertain嘅feel又开始嚟啦，其实一直多多少少都会有啲架啦。唯有跟住大队去开晨会先啦，我哋捭人安排企喺最外面嗰排，成日都人来人往嘅地方，整到我哋显得特别格格不入，特别係死人MOE嗌我哋white shirt dark pants，同人一身全白真係差好远，而且我哋呢啲一睇就知道唔係local嘅样，仲要唔止係晨会，係基本上所有公众场合都会捭人参观，呢只feel真係好怪啊。。。

晨会上面见到Local讲嘅嗰个肥佬校长啊，真係好得意啊，不过似乎最多只係OK好玩嗰只啦。到个会差唔多完嗰阵突然间班长同我哋讲话等阵要全部人一起上台，原嚟係一个一个上去同个肥佬校长握手然后企成一排接受VJ学生嘅嗰阵零落嘅掌声，之前传闻嘅嗰个自我介绍似乎係流料，太好啦。。。

开完会黄骅个buddy SiMin同我讲话我个buddy Derren佢overslept，嗰阵时仲喺路上，嗌我跟住佢上第一堂tutor先，冇所谓啦，join住佢哋先啦。佢哋第一堂係maths，派测验成绩，大家都有少少紧张，似乎SiMin今次嘅成绩唔係太理想，见佢跟住落嚟个人都比较down，一次半次嗟，唔使咁唔开心嘅，下次一定会考好啲嘅，捭啲信心自己啦。。。

数学课上完SiMin哋有一个period嘅break，然后就跟住佢同佢班同学一起落canteen食嘢啦，比较唔知点嘅就係一个唔小心被迫黐埋咗个女人堆度，都係咪搞，食嘢嗰阵都係同返胖子佢哋坐好过啦。差唔多要上下堂课嘅时候终于见到Derren啦，同我差唔多size嘅一个男仔，好强嘅local feel。后嚟同佢倾落先知原嚟佢唔係我先前估嘅广府人，不过有惊喜，佢係客家人，不过唔多识客家话。佢90年嘅，细过我啊，唔制啊！！！佢应该係一个几劲下嘅人，又係学生会成员，又有份搞Arts Day嘅活动，而且读书唔错，今日发咗两张paper都係A，佢下昼仲喺华中有个interview添，本身佢主动话带我一起去架，不过好可惜部车唔够坐，下昼就唯有跟王雨同佢个buddy JiaYi玩啦，JiaYi係广府人，但係一啲都唔识广府话。睇嚟我个buddy都几忙下，不过JiaYi就话佢其实动作颇慢下架，加上佢今朝overslept迟到，突然间觉得好似Derren係特登帮我度身定做嘅咁。。。

朝早上咗堂bio嘅实验课，係嗰只将某种基因注入某种细菌然后观察细菌变化嘅实验，个人感觉比喺省实做嘅嗰啲求求其似乎先进唔少，虽然同其他理科课一样会听到失重甚至游魂，但係我当然唔会错过呢个玩实验嘅好机会啦，我都帮手做咗唔少嘢架。。。

下昼上咗堂lecture，係讲English literature嘅，又係一堂游魂课啦，抓紧时间整理下部蠢手机嘅电话簿先。最后一堂係bio嘅tutor，听个miss好有感情咁讲咗一堂，然后就到两点半，JiaYi今日嘅课全部上晒，可以走啦。不过比较不幸，出去揾车站嗰阵时捭JiaYi指错咗方向，晒住太阳行过去东海岸嗰边剩係揾到一条唔多啱嘅线，冇计，返过另一个方向啦（我本身就话係嗰个嘅，但係冇人信），最后搭55转绿线转紫线再转143返到Labrador。