真係太耐冇打开过呢个叫做Hi嘅文件啦，宜家重新打开呢个已经储咗我两万几字嘅朋友嘅时候竟然觉得有啲陌生，要勤力啲打blog啊！知道未？！！！

今晚打咗两个电话畀同学，准确嚟讲应该係好多个，不过只有两个係可以最后听到对方嘅声音嘅。。。滔滔同麻雀仲係处于关机状态；妈子等到我听完佢成首彩铃都仲係冇接，浣熊要快啲好番啊！其他暂时忽略。

插一段，发现一个问题，似乎我宜家讲母语都开始口齿不清啦，希望喺错觉。

基本上所有人都军训完啦，亦都应该要正式开始新嘅大学生活啦，好羡慕啊，而我呢种疑似部分解构主义嘅无聊嘅无奈嘅campus days就仲有成年要过。都係唔好谂呢个问题啦，讲亲佢就乱架啦，大概嘅情况就係，留喺宜家嘅宿舍入面就嚟要癫咁滞，所以极之渴望可以尽快搬入大学嘅宿舍，但係一谂到住喺大学宿舍会遇到嘅一大堆麻烦同埋唔方便，又有啲唔情愿啦，谂深一层发觉其实宜家嘅宿舍亦都唔可以话算係太差，起码我仲可以去海边发泄下，亦都可以比较方便噉去到一啲比较colourful嘅地方，仲有个独立嘅厕所同埋冲凉房，而且乞人憎嘅un高已经走咗，但係就依然係有一大堆可以令人非常痛苦嘅嘢等紧我，太逼太吵太热啲餸太难食，又开始对大学宿舍产生好多好美丽嘅幻想啦。算，我转话题。

据不完全统计，听讲除咗肥妹係晒黑咗一段时间之后白番之外，其他人都有不同程度嘅晒黑，迟两日我都要去camp啦，唔通我都要晒黑埋一份？唔可以！！！我仲未可以晒黑住。

有唔少人都比较抵触大学城嘅生活，讲真，其实我真係几向往架，今晚呢两个电话都比较印证我嘅观点，不愧为一间宿舍嘅人（好挂住8126，睇嚟要揾边日打篇嘢嚟怀缅我嘅高中宿舍）。中大的确几幸福，大一就可以带电脑返学，而且发觉佢哋嘅活动真係几好玩，去贝冈村饮糖水，唔错唔错。个人觉得其实喺大学城入面真係可以好好玩架，首先就係可以揾到好多好多高中玩开嘅同学玩啦，好似今年噉样大规模逼入中大华工就更加啦，仲有广外华师喺隔离左右，太幸福啦，而且大学城入边可以发掘嘅corner真係太多太多啦，大学玩完仲可以deep into啲村入面继续玩，大学城里面就有南北亭、穗石、贝冈，附近仲有深井、长洲、官洲、小洲、新洲等等等等，太多数唔晒嘅地方可以去哨啦，太有趣啦！！！（可惜我剩係去过北亭、穗石、长洲、官洲、新洲）难怪腾腾要买单车，唔错唔错，我好满意。虽然大学城返屋企会比较远，但係嗰段旅程应该会几好玩挂，虽然大部分人都会选择搭地铁，但係个人认为其实搭巴士都可以係一个唔错嘅选择（尽管广州巴士比较邋遢比较逼，而且冇二楼，如果要攞衫返屋企洗就更加难讲啦），特别係可以喺车上面睇住沿路上面呢座自己嘅城市嘅极之微妙嘅变化（好似中华广场嗰栋写字楼我就係噉样一层一层噉睇住佢大架啦），而且通常周末返屋企都係一班同学一齐嘅，好似高中噉，其实真係好开心架，又可以返屋企啦。

好兴奋啊，已经book定咗唔少床位啦，就等住我今年寒假返广州再慢慢玩啦，万恶嘅MOE竟然胆敢企图剥削我哋宝贵嘅回国假期，一个二个同我全部落地狱！！！挡我者死！！！

今日转行彻底嘅迷幻路线。

从朝早讲起，话说我哋宿舍除咗好早起身嗰个人同埋近排处于颓废到腐烂状态嘅AP之外，其他四个人都晏咗起身，导致累埋隔离宿舍嘅一个406忠实fans五个人一齐迟到。其实喺未够七点嘅时候我个闹钟已经好准时噉喺度无与伦比的美丽架啦，然后我好本能反应地擘一擘眼，见到AP同学仲喺度CS紧，跟住又好本能反应噉再瞓过，等紧第二第三个第n个闹钟仲有宿舍嘅其他同胞嗌醒我，点知呢几个闹钟都比较失效，一直到我七点半到起到身之后先发觉已经晏咗啦，大家都係，PS，AP同学瞓咗。

跟住返学嗰条路线仲迷幻，我发觉我嗰阵时应该控制住局面，号召大家搭30嘅，点知就咗肥仔嘅意思，188转紫线转绿线转179转校车C线。

跟住上咗一朝莫名其妙嘅chem，多方面原因导致我中午买麦伯嗰阵嗌咗个Mc Flurry upsize。开始发觉自己今日转咗路线，越嚟越迷幻啦。仲有一个问题，宜家麦伯开始送礼物啦，买一个upsize meal就送一个奥运纪念玻璃杯，一个星期一款，一共五款，噉跟住落嚟嘅一个月我应该点算呢，如果一个星期3至5餐lunch帮衬佢，噉五个星期落嚟咪收埋几套杯啰，我宜家已经有两个archery啦，眼瞓啊。唔係咁好意思keep住做佢生意个窝，但係我伟大嘅增磅计划係唔可以因为一啲无论大事小事而受到影响架，呢条题唔识做啊，眼瞓啦。

今日出咗去一日。

首先一早起身同befriender组去咗Chinatown嗰边一间叫地茂馆嘅茶楼饮茶。虽然啲嘢唔算係十分地道，唔算有feel，品种亦都好少，得十几种（喺广州，一间茶楼点都应该有几廿到一百种啦），而且喺Singapore饮茶真係好唔抵，但係出品仲可以，而且仲畀我揾到个扮下嘢嘅场合，点都算係聊以安慰啦，仲有就係，真係好多谢各位befriender嘅努力，帮我哋安排咗一个好愉快嘅outing，多谢。

下一个活动係去Vivo嘅Golden Village睇Kongfu Panda，尽管比较旧，但係适合集体去嘅似乎就得佢啦（不过到咗戏院先发觉原嚟有一出新上画嘅Hancock似乎係一个更加好嘅选择，不过算啦，已经订好咗飞啦，download啦），志在大家一齐开心嗟，新旧冇乜所谓啦。关于呢出戏亦都无谓多作评论啦，过渡到下一个节目啦，喺Swensen嗌咗个雪糕birthday cake同三个人庆祝生日，又係唔错嘅一餐，除咗嗰只冻僵咗嘅一放入口就令我感动到热泪盈眶嘅士多啤梨。喺呢三个主活动中间有好多空档时间，然后大家就係周围哨啦，哨街期间发现，似乎自己有时颇i，但係又好似唔係几i，冇嘢讲嘅时候係可以喺埋一边冷场嘅，但係揾到嘢讲嘅时候又次次都唔够时间将自己嘅一个完整嘅topic搞掂嘅，噉代表咗乜嘢呢？

夜晚就冇继续跟住befriender们佢Queensway嗰边继续食晚饭啦，要返宿舍同另外一班人集合，去下一个活动啦，我哋嘅host family啊，今次佢哋带咗我哋去Bukit Timah嘅一个hawker centre食Northern Indian food。啲嘢食几有特色，试咗好多自己去食冇乜可能会点嘅嘢（其实噉样嘅Malay，Indian等food centre亦都係冇乜可能会自己主动入去啰）而且浓烈嘅香料的确可以呃到唔少人，但係始终觉得真係太粗啦（好多嘢都烤到有一部分完全黑成一旧炭），不过只係试试玩玩而已，畀下面人哋啦，无谓大家都冇瘾啦，点知噉就畀呢个好热情嘅host family质我食咗好多嘢，好饱。但係成晚就得我同肥仔喺度努力维系紧一堆好零散嘅对话，而剩低两个女仔就基本上都唔出声，真係比较痛苦，整到我到后面都开始冻埋一份，希望host family仲未觉得我哋冻啦。佢哋真係好热情，有啲出乎意料，多谢。

未够十点就到咗宿舍，但係又唔想咁快入房局，好嘅，出去海边行下啦。抵死，条死肥仔又话自己点饱点饱，但係就係喐都懒喐，最后得返我一个人去，唔理，一个人有一个人嘅好嗟。出到海边见到好多星星，而且今晚嘅云形状比较特别，再加埋城市灯光嘅照射，一定程度上颇有极光feel（记住，我宜家离赤道仅约一百公里）。而且今晚嘅能见度比较好，云量亦都非常非常低，又见到一啲比较典型嘅细个喺十万个为什么里面睇到嘅星座啦，好似蝎子同埋猎户，不过比较不解嘅係，平时见到嘅心宿二同埋佢旁边两粒星星排成嘅嗰个担杆平时喺天上面见到都係好明显嘅（平时就係靠佢嚟认蝎子架啦），但係点解今日就基本上一啲都唔突出，唔明。仲有，竟然睇唔到小熊座同埋北斗星，应该係灯光问题挂。

我变态，我又想返去高考，其实噉样都唔算係变态。对我嚟讲，噉样好正常。

高考放榜，打电话同埋msn揾到部分同学再加埋呢边嘅同学嘅口耳相传，得到咗一啲消息，再加埋今日份报纸，个心自然啰啰挛，好想返去高考。

之前未离开嘅时候，真係不免会犹豫，自己係咪应该经历一下高考呢，尽管高考并唔係理所当然存在，但係作为呢一代人，我想经历下，特别係我中考亦都冇考。学建筑嘅理想因为硬件问题失之交臂，亦都冇信心去争取啲自己都唔知道应该係乜嘅乜嘢，quit可能係当时心里面最好嘅solution挂。当时对未来所有状况都极大理想化，最后冇点犹豫就选择咗呢条岔路。后嚟，各种机缘巧合之下，真係考到咗scholarship，一啲关于继续高考嘅幻想就开始啦。起初只不过係对于一啲人“未经历过中考，亦都未经历过高考，呢个人嘅人生严重残缺”之类嘅讲笑或者冷嘲热讽嘅唔抵得，后嚟自己亦都开始谂，如果真真正正噉去打呢场仗，我可能真係可以考得好好，我想试下自己嘅能力去到边度啰。不过算啦，考到做乜又衰仔唔去嗟，然后就喺嗰个好多残酷嘅现实都仲未知道亦都预料唔到嘅时候离开咗。

上岛后发现自己当初真係好天真，好多嘢都只係会喺你嘅想象里面显得吸引，但係现实基本上都係残酷嘅，已经冇乜回头路好讲啦，算啦，顶硬上啰。要后悔嘅仲係偶尔后悔一下，冇计，嘢係唔失去就唔珍贵嘅。现实同期望值差得太远，有受骗嘅感觉。入唔到钟意嘅大学，揾唔到钟意嘅专业，对未来越嚟越冇方向感，人亦都开始变得悲观，以前好容易就可以唔记得晒嗰啲唔开心嘅嘢，但係宜家唔得，partly唔得啦，一啲真係好唔开心嘅嘢係可以耿耿于怀好耐嘅，好似大学，专业同埋以后应该点过嘅问题，仲有朋友。个人颓，冇动力，冇冲劲，真係做唔到嘢架。更加开始明白点解当时乔冬梅会话我其实係选择咗一条更加困难嘅路。开始谂，如果我真係选择留守，真係努力去争取嘅话，话唔埋真係可以揾到一条更好嘅出路，起码我对自己嘅能力仲好有信心，而且18岁仔都未试过真真正正噉努力去追逐过啲乜嘢。

暑假返广州，见证咗我哋呢一年人嘅高考，亦都亲眼睇住呢道后门嘅正式关闭，体会到其他同学嘅喜悦，更加意识到自己嘅失落。特别係喺毕业典礼上面，其他同学都开开心心噉攞到属于自己嘅毕业证书，一个对于自己三年，至少三年奋斗嘅证明，而我，因为自己嘅身份问题，就只係攞到毕业证嘅封皮，尽管毕业证以后会补番，但係有时心里面会觉得自己係冇呢个资格去攞呢个证明嘅。高一高二浪费咗係自己嘅懒散同埋惰性上面，到到高三应该认认真真去争取嘅时候，自己又放弃埋呢个最后嘅机会，仲有乜好讲吖。嗰日嘅毕业典礼只可以话係又有参与感，但係又好冇参与感，可以同班冇见好耐嘅同学一齐开心，但係係为咗唔同嘅原因，我应该係陪佢哋一齐开心挂，或者係重新见到一班失散咗半年嘅同学挂。喺同班同学一齐出嚟玩嘅嗰珍贵嘅几日里面，虽然觉得我哋真係好耐都冇咁close过，但係同时亦都觉得我哋之间嘅距离的确係无可避免地拉开咗，其中一个表现係好多时候佢哋gossip嘅嘢我都唔係咁sure佢哋讲紧嘅係乜，悲观情绪一嚟，就开始怕，怕以后大家更加各奔东西，我会唔会失去佢哋，好怕好怕，特别係当我作为一只对朋友嘅占有欲极强嘅蝎子嘅时候（唔知点解打到呢段嘅时候，伴住腾腾个blog嘅歌，竟然会打到眼湿湿，无可否认，喺地震之后个人脆弱咗唔少）。为咗         ，我愿意高考。

避唔开，18日太短，始终又要离开，冇过几耐，又到高考放榜啦。其他同学都攞到咗自己嘅成绩，无论好定係唔好，开心定係唔开心，总算告一段落，亦都得到咗个结果，而我係呢边，就只可以无力地祝福佢哋，同佢哋一齐开心或者唔开心，自己就只有失落，唔甘心。近两日开始有啲噉嘅谂法。如果我选择留守，真真正正噉努力一年，话唔埋我可以考到同济嘅土木，噉样绝对比宜家嘅现状好好多，虽然话自己一直觉得建筑师create，工程师construct，但係噉样都可以算係聊以安慰挂，可惜喺呢度嘅土木唔强，而且冇前景，何必要兜咁大个圈去争得个食之无味弃之可惜呢。如果我当初根据自己嘅兴趣拣地理，而唔係根据现实拣咗物理，话唔埋真係可以考到个状元，话唔埋真係可以，如果嗰次地理奥林匹克嘅省复赛唔係肥全话唔畀高三生去，话唔埋我可以作为省实队嘅一分子代表中国去津巴布韦比赛，而唔係后嚟嘅华附队，不过算，无论係唔係撞彩，我已经喺初赛证明过自己啦。喺呢边报专业限制多多，如果我留喺中国，我嘅未来一定自由无限倍，我一定可以做到更加多想做嘅嘢，会更加接近自己嘅理想，我仲係好想高考。

可惜，呢度后门已经关咗。

终于将所有嘅final exam同埋presentation都搞掂晒啦，压抑期过咗，係时候认真冷静噉谂下一个近排发现嘅问题，应该係近排比较on mind嘅一个问题啦：朋友。其实，可能係一直都好on mind。

究竟喺我嘅概念里面点先算係朋友呢，我又有几多朋友呢，特别係喺Singapore，係有好多个，定係喺真正意义上面一个都冇呢，佢算唔算係我朋友呢，噉佢又算唔算係啊？其实对于呢堆问题，自己喺上岛之后一直都会比较先入为主噉hold住一啲颇negative嘅答案。特别係当第一个月嘅无聊时间过咗，开始要面对好多好实际嘅问题嘅时候，开始觉得对越嚟越多嘅嘢感到失望，包括人，而且离开咗广州嗰班比较老死嘅朋友，突然间嚟到一个又陌生又唔係咁陌生嘅环境里面，lonely feel係无可避免嘅，况且，要真正揾到一个好好好好嘅朋友係真係难过登天嘅。慢慢慢慢，仲整到之前考试嗰段压抑期个人真係颇怪，经常都会见到人唔想打招呼，就算係一啲比较熟嘅人，可能係唔想啦，又可能係懒得去噉做挂，懒得去假？

开始realize到一样嘢。我发觉嚟到呢边之后，身边係似乎未有过一个或者一班比较固定嘅玩得比较埋嘅朋友嘅，经常都係呢排我同佢哋玩，跟住过多轮我又会同另外一班人玩，然后再过多个周期之后，又会係再另外一班人，甚至係转嚟转去，最后又会同番之前嘅一班人玩，但係就始终冇一啲long lasting嘅。

关于呢啲嘢，我同唔同人complain过接近无数次。senior会同我讲话呢啲嘢其实都好正常，特别係喺我呢个阶段，佢哋都经历过，都suffer过，但係佢哋宜家都可以揾到好friend好friend嘅人，呢啲只不过係时间嘅问题，以后会揾到嘅，放心啦。但係嚟到呢度半年话长唔长话短唔短，按照宜家嘅状态，我会对后边冇乜信心啰。就喺考完试嗰日下昼嘅MOE meeting，我同一个最近玩得比较埋嘅东北人一齐坐，个会太无聊，两个人开始吹水，唔知点解吹吹下又飞咗过嚟呢个话题上面，我又忍唔住complain话喺呢边一直都揾唔到一个好好好好嘅朋友，佢答咗一句：“我们不就是朋友吗？”希望呢句唔係佢对我嘅一个好dry嘅安慰啦。经常同麻雀讲电话，前排，觉得自己比较悲观嘅佢又得出咗一个同样嘅结果，当你同一个人或者一班人喺埋一齐玩得好埋，过咗一段时间之后你就会发现唔少你之前冇预计到嘅缺点同矛盾，呢啲缺点、矛盾通常都会将呢啲短暂嘅friendship切断，换句话讲就係距离产生美或者係相见好同住难，而且你再好嘅朋友都係唔可靠嘅，佢哋点都要有自己嘅空间，自己嘅爱情，唔可能好似你想嘅噉完全属于你，而呢个时候，我真正需要嘅，应该係一段爱情，but sorry，我暂时冇乜兴趣啰，自己都未揾到温暖，仲要去畀温暖人，   ，我仲想生存落去。

就返广州嗰段时间有一日一个人出去海边跑步，返去嘅时候撞到阿欢同陈思颖两条傻婆亦都喺度跑紧步，讲起先知原嚟三个人都係撞埋嘅，首先阿欢想去跑步，然后落楼撞到陈思颖，佢又啱好出门口想去跑，跟住仲喺jetty上面撞到我。返嚟路上，阿欢突然间爆咗句出嚟话发觉呢个学期过得比较对称，我哋三个人啱开始嗰阵时成日喺埋一齐玩，宜家到到学期尾，我哋又喺番埋一齐。。。

细心谂落，虽然身边真係会有好多换嚟换去嘅人，其实佢哋两个都应该算係比较long lasting嘅朋友挂，从Singapore计起。而且喺广州嘅朋友一直都会喺番嗰度唔会逃走，去Singapore之后唔只佢哋两个，仲有个好好嘅senior，仲有嗰啲飘嚟飘去嘅人，而且仲会有好多potential嘅好朋友喺后面等住我，乐观啲好。

经过多番扰攘，我呢篇blog终于终于搞掂啦，掌声鼓励下先，其实喺返广州之前已经基本上打完架啦，不过就，至于嗰啲荒诞嘅悲惨故事就唔好讲啦，尽管迟咗好多日。

今日係我重获自由嘅第一日，好开心好好玩啊，梗係要冲出去跑下啦！！！

我好少用三个连埋一齐嘅叹号架，睇嚟真係太兴奋啦，终于自由啦，终于可以呼吸到出面嘅新鲜空气啦，weekend终于可以无忧无虑噉瞓番觉好嘅啦，太多终于可以啦，真係讲都讲唔晒，救命啊，我又开始外星啦。之前星期日仲同一个人讲紧关于自己厌世嘅问题，仲同一个人讨论紧我都差唔多冇咗定义嘅朋友嘅定义嘅问题，嗰阵时个人真係比较灰，睇嚟我又要揾我可爱嘅大海求救啦，好在啱啱好今日就解禁啦，太感激啦。

出去跑之前仲重温咗部分Eason Get a Live 06 Hong Kong嘅部分片段，整到个人更加high到无伦，跟住就同两个最近比较好嘅人一齐出去跑啦，high过头，一支箭冲咗上山跟住又唔停噉跑番落嚟，跑到最后到海边嘅时候发觉个肺已经有少少hurt唔係好顶得顺。睇嚟三个星期冇跑过步个人真係退化唔少，我要控诉嗰个万恶嘅死人光头怪！仲想跑去嗰条栈桥嘅尽头添架，太冲动啦，跑唔落去咪唯有瞓喺一张海边石凳上面摊尸啰，点知噉就畀我发现咗一个睇呢个世界嘅新角度啦，虽然张凳之前畀太阳晒咗一日已经好热好热啦，但係瞓喺上面就係会有一种唔係好识形容但係就係好舒服嘅feel，瞓到我都唔想走啦。最后就畀个人夹硬扯咗起身一齐慢慢行过去栈桥嗰边啦，今日真係连个天都同我一齐开心埋一份，一路喺海边都好好风，行到去栈桥出面仲越嚟越大风添，整到我坐喺围栏上面又唔想走啦，今次仲要畀两个人夹硬押咗返去。发觉自己真係太耐冇出嚟发泄过啦，忍唔住又大嗌啦，嗌到上scream，真係太released啦，不过似乎我除咗大声唱歌之外每次嗌都係scream架啦。

一路行返去到到食饭，三个人一堆gossip八极都八唔完，最后encore到九点都仲未讲得晒，但係要做功课啦，乞人憎嘅无聊功课，我憎死你哋！

太耐冇写过嘢啦，亦都太多嘢要记低啦，应该从边度开始？

近期大家嘅blog都静咗。

签report签到同un高aunD熟晒。

Google Earth广州部分更新啦，市区换咗张相，南沙都有清晰图像啦。

我要买部好劲好劲嘅相机，返广州影到够为止，如果暑假嗰十八日揾唔到乜嘢好做就净影相，乜都唔理。

发觉喺广州miss咗唔少嘢。

闻到支off嘅味道，突然间返番去十二月。

鬼婆Christine喺班度帮手宣传SEPO。

健康啲啦。

搬咗张书台入房，黐住张床，谂住唔使俾人烦，但係其实佢哋要干扰你嘅话，你係点避都避唔到嘅，你都知佢哋嘅威力。。。

入边好局。

话效率高咗似乎有少少自欺欺人，只不过係可以安静少少坐低嘅时间长咗。

Final嘅worksheet同lesson plan，俾Christine嘅翻译，SEPO嘅proposal，Integrated嘅阅读，省实嘅研学。。。

对佢哋好失望。

Host family，微冷。

失重。

竟然趴喺张台度就训着咗。

喺张台度训到8点，冲个凉，上床继续，竟然训过咗两次report时间，竟然补番就乜事都冇，Uncle好人就係唔话得。

啲死人头发一长番少少就开始黐晒线乱咁飞，好烦啊！

其实office嗰五个人都好好，as long as Miss Tan同Un高 Patrick唔变态。

宜家佢哋个个都识得我啦。

好想唱K，好想睇戏。

对个黐线网甘拜下风。

点样从中东返嚟Singapore？

我要从良！！！

今日中午其他人出晒去食饭，剩得我一个人喺宿舍，难得嘅安静啊。

虽然平时喺出面做乜都想有多个人一齐，但係好奇怪嘅係，喺宿舍我係几乎几时都好想一个人个窝，我係真係颇enjoy呢种一个人嘅安静个窝，喺宿舍，其实。可能我平时夜晚唔愿训会有一部分係因为呢个原因挂，一个人霸住个厅嗰只feel太好啦。

前几日有人收到料话我哋下个学期返嚟嘅时候会重新分房，但係唔係坚料就难讲啦，而且好多人听到之后都唔係咁赞成，到时有冇可能重新分房就更加难讲啦。不过我有时会觉得呢个可能会係一个好消息，特别係夜晚想静静唔到最烦最烦嗰阵时。但係有时静落嚟谂下，你宜家就成日complain话乜嘢cultural shock，乜嘢有时大家嘅各方面习惯会唔夹，但係你保证到你可以分去一间好好嘅宿舍咩，而且你唔钟意，人哋都会唔钟意嘅嗟，大家都互相包容下就冇事啦，何况你要complain嘅嘢又唔係一日廿四小时都持续嘅，忍忍佢就过啦，一年时间真係好短架咋。咁谂嘅话其实我哋宿舍都算OK架啦，起码大家都仲係好融洽好和谐，而且唔会好邋遢，虽然比较乱。

讲讲下就又谂翻起8126啦，虽然只係一齐经历咗高一一年，但係大家都玩得好熟好开心，唉，分开咗之后先识得珍惜，太迟啦。

最后有个问题，喺sm2入边，roommate呢种关系係咪真係话有就有，话冇就冇架啦？

讲到最尾最尾，其实我仲係好希望好希望可以揾到一个好好好好嘅roommate架。

好想变大一届啊。

冇得出街啦。

宜家已经两点n啦，虽然唔算太晏，但係呢几日实在係已经捭人耗尽咗啦，所以其实已经好晏啦，不过我应承过自己要写呢篇blog嘅，我一定要写落去！

其实呢排又混乱又压抑，要写嘅话都应该会有好多嘢可以写，但係我觉得会唔知点写好啰，真係太乱啦，try my best啦。

首先每朝又眼训又压抑咁拖住自己条尸喺JC游荡就唔係乜嘢好事，不过我后嚟学精咗啦，去图书馆摊尸会係个唔错嘅选择，呢几日都冇点上课（呢两日係直接逃课成日），喺我哋嘅中国学生会馆（图书馆）等到1点到就走人，晒太阳晒到呕咁行去嗰个千里之外嘅bus stop，等好耐等到部10号就上车走人。好激气啊，次次都係对面方向走咗两三部双层嘅呢边都唔嚟一部，而且嚟亲嘅都係冇二楼嘅，真係嬲嬲地就唔想上车架啦，又唔舒服又唔好训仲要只feel唔啱，本身就一直都好想训架嘛，咁样嚟折磨人，不过唔知係咪最后一日真係有只无情鸡，我今日竟然一个人返嚟搭到部双层窝，仲要捭我突然间发觉其实一个人有时真係几好架。

寻日真係为咗Earth Hour嘅活动整到有少少崩溃嘅趋势，混乱地忙，咁咪忍唔住又同肥鹏complain咗两句啰，点知捭佢闹返转头，嗰阵时真係颇郁闷下，特别係觉得自己唔捭人理解嘅嗰只feel。唔理咁多啦，搞掂应该做嘅嘢先啦，搞嚟搞去搞到到12点n嗰只失常Miss Tan发晒火咁赶我哋上楼训觉，寻晚嘅问题大概解决咗大部分，觉得个人松咗唔少（亦都可能係个人已经散架咗），发觉似乎除咗功课我都唔算好忙好忙嗰只，咁其实我算唔算忙呢？今日仲变态，下昼自己赶返嚟继续搞Earth Hour，又要顾JC夜晚烧烤自己过去嘅时间路线，第二日JC请食buffet要推咗去英华嘅活动，跟住返上楼攞嘢途中撞到一个SM3突然捭佢提起今晚我仲有另外一场烧烤，然后就开始一路上楼落楼攞嘢放嘢，一路不停打捭呢个打捭嗰个，仲要挂心听晚活动嘅嘢，中间，突然间一个念头闪过，好似咁样都几好玩吖，我变态嘅，唔好理我。最后join咗后面嗰场烧烤，返嚟嗰阵已经就嚟11点啦，继续关于我哋Earth Hour嘅讨论，因为我jay返宿舍，所以唔少同行嘅人返嚟见到我已经坐咗喺度讨论嘅时候都有啲惊讶，见到佢哋嘅表情突然间有发作啦，竟然会有满足感窝，我开始变态啦。咁其实呢两日咁嘅状态算唔算忙呢？

前几日睇咗省实几个同学嘅blog，突然发觉自己原嚟真係有唔少遗憾留低咗喺省实，不过呢啲以后得闲啲再慢慢扩展啦。

仲有，虽然SS－Zone我已经因为失望好耐冇上过，但係前几日又上去哨下，但係试咗好多次都係该页无法显示，似乎捭人封咗，烦，过咗两日又係咁，不过后嚟误打误撞又捭我上咗去，睇嚟应该係因为一啲讲西藏问题嘅帖而捭人封，唉，政治真係烦。

早唞。

其实一模今个星期三已经完咗，但係由于某啲比较低B嘅mistake，一直都冇点同高中班友联系到，呢两日升息成功揾到咗麻雀同浣熊，最令人郁闷嘅就係嗰个死人妈子，手提唔係关机就係听晒佢成首曹格都冇人接。死啦，仲有8126嗰班友啊，咁嘅速度落去，几时先讲得晒，嗰啲就嚟abandon咗嘅半friend点算！

越嚟越接近高考啦，得返两个半月时间。虽然觉得佢哋嘅状态都仲係同以前冇乜两样，但係唔知点解心里边会有时唔自觉咁暗示自己话佢哋变咗，整到有时心入边感觉唔知点嘅，讲讲下就时不时会觉得唔自然，甚至断开几秒冇嘢讲。特别係嗰只死人浣熊，本身不电话就收得唔清，佢自己讲嘢又细声，郁啲就两个人都有少少唔知讲乜嘢好嘅feel，但係friend点都係friend，话题开咗都仲係停唔低（停低咪当係食带啰），当然啦，有我呢个吹水专家喺度，边会有冷场嘅。我啲长途质量好高架，只要係我主动打出嘅电话，冇一个钟係唔可能收线嘅。好搞笑啊，呢两次打捭麻雀，佢讲讲下都会将个电话递捭Lily等佢同我继续讲，唔知点解，同亲佢倾呢就次次都会唔小心变成我嘅complain会，然后佢就会同我讲道理，同临走前嗰个学期同佢坐嗰阵时一模一样。其实我真係会尽量忍住唔讲嗰啲complain类嘅说话，多啲听佢哋讲下心里话，但係唔知点解，呢几次我都会讲下讲下忍唔住就complain咗两句，然后又变成佢哋嚟同我讲道理，开解我。似乎係有时真係唔知讲乜好，跟住忍唔住就变咗我嘅complain啦，可能真係高考近啦，佢哋都唔同程度上麻木咗挂。呢两次搭返去，本身係谂住趁一摸完佢哋吹下水，顺便关心下佢哋嘅近况嘅，但係显示同设想差得颇远，讲亲一摸佢哋都会冷晒嘅，麻木嘅一种表现啊，都係讲返啲八卦嘢会热啲。班友始终都係变咗。

佢哋再过多两个半月就解放啦，而我，就仲有十一年contract绑住（我通常就係咁样不知不觉从开解便称complain架啦）。乔冬梅（高二下同高三班主任，神经质嘅英文老师）曾经同我讲：“其实你选择了一条更辛苦的路。”啱开始嘅时候会不以为然，但係我宜家真係越嚟越体会到呢句话所讲嘅嘢啦，真係好挂住佢，尽管讲嚟惭愧，已经两个几月冇揾过佢啦（其实只係揾过一次而已），仲有之前应承佢发返去嘅一封关于SM2同SM3嘅E-mail一直到宜家都未有咩音讯，你话点好。其实封E-mail关于我喺Singapore嘅现状同SM2 scholar生活嘅前半部分我一早就已经写好晒啦，但係后面关于SM3嗰part我就真係唔知点写好，本身自己就唔係咁了解情况，而且又觉得SM3呢个项目似乎唔係咁好，又难考又讲个人彩数，唔确定性极强，真係唔想喺呢个关键时刻再去影响班同学，或者係去动摇佢哋。仲有一直从高一带到我哋高三嘅黄为（数学特级教师，教咗卅几年书，省实镇校之宝）同埋高二嗰年一直都几关心我嘅罗丽佳（高二上代乔冬梅嘅班主任，好有内涵嘅语文老师）啊，但係又唔知应该点样开口同佢哋讲嘢，同佢哋讲乜嘢。好似黄为咁样压得住场面嘅特级教师就自然唔使多讲啦（鬼叫自己又唔係最好又唔係最差，唯一出名到佢都话过自己唔少嘅就係懒同求其），但係高二一年一直都同罗丽佳玩得好熟架，点解到咗高三分开之后就好似突然间变咗陌生人咁？我唔要咁样！

我应该主动啲挂。

今日喺出面哨足一日。

首先係朝早喺Marina Square嗰间Chapter 2剪发，麻麻，虽然个hair dresser都算有啲心机。间嘢大概係IOU，Tommy咁嘅水准啦，不过喺Singapore就，算啦，但係刮咗你28蚊坡纸，心寒啊。以前喺广州去边度剪都无所谓，而且可以一个月一次，但係喺呢度就冇呢支歌仔唱啦，好惨。

仲买咗只狗捭自己，我上岛后第一只公仔，然后就好想买好多好多咁样嘅古灵精怪嘢返嚟堆满成间屋，可惜，喺Singapore我得一张床，同埋最怕见到一啲好可爱好可爱嘅嘢捭其他人糟质，嗰班人係点嘅，心里有数啦。我好想要一只超级“le fe” feel嘅公仔啊。

同我只狗影返张先

食完餐晏仲要赶去Orchard做Integrated嘅final project，痛苦啊，係Orchard行咗两个钟，竟然就係得个行，得个戆十咁周围行周围影，又尴尬，又煎熬。

唔理啦，一定要捉埋肥鹏出嚟陪我行返够本先得，绝对唔可以失望住返去，我要认认真真咁哨一次街！寻日出咗粮，加上喺关禁闭之前嘅恐慌式购物欲驱使之下，突然间好想买对鞋捭自己。点知行咗好耐都揾唔到一对自己钟意嘅，见到对稍微顺眼嘅，又话冇自己嘅码，郁闷。觉得对Nike同Adi比较失望，好似等咗好耐都冇乜新款出嚟啦，亮眼嘅就更加唔使讲啦。对Singapore都不无失望，呢度转款好慢啊，同广州冇得比，香港就更加唔使提啦。

次次同亲肥鹏出街一掂埋就两个都电到，Singapore都颇炎热潮湿下个窝。。。都唔好玩嘅。今日似乎佢仲有唔少自己功课要做，蹝咗你成晚，唔好意思啊！

出嚟哨完之后心情就係唔同，keep住个好心情，打电话返去煲煲粥先。

听日係Good Friday，今晚门禁十一点啊，dorm班人真係转死性啊。难得有一晚可以晏，梗係唔可以放过啦，就咁捉咗嗰个JC嘅同班同学一齐出去海边啦，九点先出门口。。。

今晚比较癫，两条友着拖鞋走咗去栈桥嗰边嘅沙滩度行落海斋企，当然，嗰啲浪打浪打出嚟嘅尖叫声係一定有嘅，企企下发觉原嚟个海涨潮真係好快架。最后整到条省实青BB短裤裤脚湿晒，但係都仲係未想返去，唔怕，继续返去堤岸边坐，坐到想走为止啰。唔经唔觉就咁到咗十点半，慢慢行返去，啱好十一点搭正返入监仓。

今晚出去玩，complain係一定唔少得架啦，两个人互相complain咗唔少嘢，而且亦都知道咗唔少彼此嘅谂法，再加埋我哋呢个咁神奇嘅海，返去之后发觉心情真係好返唔少，希望呢个状态可以keep住啦。

返嚟之后仲有一个惊喜，同我出去黐线嗰条友后嚟仲托咗个人送咗串纸鹤嚟我间房捭我，仲串住一张细纸，嗌我唔好心情咁低落，开心啲。。。咁大个人第一次收纸鹤。

谂返转头，我係咪每次心情低落嘅时候都会通知晒身边嘅人架？