Hans' Cantonese Space

我近排写blog一直都係用住一个类似“我好耐未写过blog啦”嘅开头，唉，人太懒，烦心事太多啦。

过去咗嘅一个星期里面算係发生咗唔少嘢，睇嚟今晚有排写啦。

从上星期四讲起，嗰日下昼喺NTU听咗一个杨振宁嘅公开lecture，lecture嘅topic竟然喺令人点都估唔到嘅“对世界GDP猛增的反思（以中国为例）”，反正我都係抱住嗰种去看个究竟嘅去听架啦，topic係乜都冇乜所谓啦，反而出于对一个物理学家讲经济嘅些许怀疑，我竟然仲产生咗一定嘅兴趣添（星加坡竟然仲有嘢可以令我感兴趣，难得）。虽然个lecture讲嘅都係一啲比较表面或者形式嘅嘢，正如杨伯伯不断重复嘅嗰句话一样（我只是以一个外行人的身份去给大家分享一下我对这一方面的思考），但係如果你係认真听嘅话，收获係点都会有啲嘅。我嘅第一印象就係难得啦，对于一个86岁嘅人嚟讲，呢个咁清醒嘅头脑的确算係难得啦。係问答环节嘅时候有一个比较不怀好意（起码我觉得係）嘅联合早报嘅记者问咗一个比较有攻击性嘅问题，结果我哋亲爱嘅杨伯伯非常轻松噉将呢个问题反驳咗返去，仲整到嗰个记者颇自讨没趣添，犀利。lecture完咗之后出嚟有唔少人都话佢喺度讲废话，甚至仲有一个我好睇唔顺眼嘅人好串噉讲咗一句“如果我拿了诺贝尔奖，我也上去讲。”但係个人认为，佢亦都只可以讲到呢啲啦，如果你嗌佢讲下佢近排研究紧乜嘢嘅话，佢讲出嚟全场有几多个人可以听得明架，无论係简单定係深入，记住，我哋听紧嘅係一场public lecture。

跟住搭嗰班推迟到夜晚7点嘅shuttle bus返宿舍，啱好係最peak嘅peak hour，喺高速公路上都塞车塞到半个钟先行咗一公里到，后嚟司机好无奈噉落咗高速公路，转入市区再兜多成个钟，喺车上面瞓唔着，然后睇咗一阵市区（应该喺组屋区）嘅夜景（其实颇唔算景），突然间发现，似乎夜晚嘅星加坡睇落真係冇咁令人郁闷窝，但係好快另外一个谂法出嚟啦，又有边度嘅夜晚係唔好嘅吖。唔好钻牛角尖。

跟住係上星期六，中午去咗一个人嘅西式婚礼，喺Mandarin Oriental摆嘅酒，碍于场合需要，嗰日着咗套唔係几正经嘅正装过去，不过效果仲过得去。关于Mandarin Oriental，真係有唔少值得称赞嘅地方，从服务到出品。先讲服务，婚礼现场布置得唔错，感觉算係几精致嗰只，营造出咗嗰种大家expect嘅气氛；然后喺就係嗰班好勤力好有礼貌嘅服务生啦，执台、铺餐巾、收碟、加水、上茶之类嘅嘢都比较到位，而且真係好有礼貌，整到你有时都有啲唔好意思嘅。出品亦都ok，特别係食材，明显係好过平时普通食店serve嘅好多好多嘅，嗰日嘅buffet嘅饭係果仁焗饭，主菜係中西荟萃，有鳕鱼扒（口感唔错，味重），红酒鸡扒（一般），大虾虾仁（粤菜做法，当然唔perfect都唔得啦，唉，思乡啦），煮牛肉（肉煮得ok，味重），同埋灼菜（比较失败），然后就有一个蘑菇栗茸汤（唔错）加一啲配汤嘅面包，仲有各种各样嘅西式点心（第二个perfect），仲有Japanese嘅，不过就得sushi（手工唔错，唔会咬啖就散晒，不过又係味重，豉油都唔使点）、sashimi（终于揾到嗰种入口即溶嘅feel啦，不过可惜件toro有啲腥，如果唔係就有第三个perfect啦）同埋tempura（冇试），总嘅嚟讲就係材料好好，但係师傅嘅手艺就见仁见智啦。后嚟返到宿舍之后成日都对身边嘅食物失去兴趣，睇嚟呢餐饭都係有佢一定水平嘅。讲咗唔少题外话，应该讲下自己对呢场婚礼嘅谂法啦，虽然係有嗰种畀幸福感包围嘅moment，但係依然下定决心喺可见嘅未来里面保持单身，偶尔羡慕下人哋就够啦。谂起宜家身边班scholars嗰种世风日下，真係比较令人呕心到顶唔顺啰，都係唔好咁愤世嫉俗啦。点解我会从一场好好嘅婚礼联想到身边嘅呢啲呕心事情嘅呢，根本就係两种唔同性质嘅事。

星期二下昼去南航嘅办事处换机票，本嚟谂住就噉就可以搞掂张机票架啦，点知佢天杀的竟然话畀我知要收297文坡纸机场税，仲要收cash，即刻当场晕低，我嘅budget又破晒啦。更加可恨嘅係当时身上冇咁多钱，卡上面嘅钱亦都用得七七八八啦，定期嗰笔又要等到十二月先攞得番，唯有下次再去过啦，真係麻Q烦。跟住返到宿舍时候发现咗极其悲壮嘅一幕，可怒也！！！我宜家极其讨厌嗰啲唔讲礼貌嘅动物啊！！！今日中午喺佢off service之前去到嗰度终于搞掂咗张机票啦。宜家机票嘅事就基本上告一段落啦，睇嚟真係係时候要努力下啦。

寻晚喺宿舍顶唔顺就出去跑步啦，不知不觉又小破咗下长度记录，不过真係耐冇跑咁长啦，今朝起身之后发现“锻炼效果”出嚟啦，睇嚟我仲係要多啲运动先得啦。